Sorabistiku studować

Witajće na Instituće za sorabistiku w Lipsku!

Studij sorabistiki rěka studować w familiarnej atmosferje, ale tež na wulkej a napjatej uniwersiće kaž tež w jednym z najatraktiwnišich městow Němskeje.

W lěće 1951 załoženy Institut za sorabistiku słuša k Filologiskej fakulće w Duchowowědnym centrumje (GWZ) na Beethovenowej 15, 04107 Lipsk. Tu su naše běrowy a rumosće, hdźež so zarjadowanja wotměwaja, kaž tež kofejownja w hudźbnej štwórći. Za dobru wuknjensku atmosferu wupłaći so krótki puć k bibliotece Albertinje, najrjeńšej bibliotece Lipska.

Lipšćanska uniwersita

Naša uniwersita liči k najstaršim a na tradicijam najbohatšim, runočasnje pak tež k najnačasnišim uniwersitam Němskeje. Wjace wo profilu našeho wuwučowanišća zhoniće na centralnej webstronje uniwersity kaž tež na universitnym Youtube-kanalu.
 

Bydlenje

Bydlenje a žiwjenje w Lipsku, w sedmym najwjetšim měsće Němskeje, hodźitej přeco hišće zapłaćić. Studenća maja móžnosć, sej swoje bydlenje wobstarać abo zhromadnje z druhimi studentami we wšelakorich štwórćach bydlić. Lipšćanski studentski skutk poskića studowacym nimo toho internaty na wšelakich stejnišćach. Dalše informacije k požadanju wo internatne městno namakaće na webstronje studentskeho skutka.

Studentske žiwjenje

Lipsk je młode, dynamiske a kreatiwne město, kotrež so wot něhdźe 40.000 studowacych jasnje sobu formuje. Nimo mnohich zarjadowanjow, ewentow a konferencow uniwersity dawa tež přewšo atraktiwny a bohaty poskitk. Lipsk ma aktiwnu wuměłsku a hudźbnu scenu; wustajeńcy a festiwale so prawidłownje wotměwaja. Zeleny wobraz města z wjele parkami a jězorowej krajinu wabi předewšěm w lěću mnohich won do přirody. Sportowe wurunanje k studijej twori nimo toho mnohostronski wysokošulski sportowy poskitk.

W stawiznach Lipska hrajachu tež Serbja wěstu rólu. Hač do dźensnišeho je Lipsk městno, hdźež so serbska kultura pěstuje.

Wokoło 600 zasydlichu so Słowjenjo do ruma pozdźišeho města Lipska – do regiona mjez Łobjom, Solawu a Modłeju. W Fredegarskej chronice z lěta 631 wobkrući so prěni raz pisomnje, zo su tam Serbja sydlili. Spočatk 10. lětstotka natwarichu so wjacore wuchodofrankske hrody na městnach něhdyšich serbskich wjeskow. Tak tež pola Lipska, hdźež so Serbja sobu při natwarje Lipšćanskeho hroda wobdźělichu. Wjele měšćanskich dźělow Lipska pokazuja na to, zo su tam něhdy Serbja sydlili.
 

Ze studijom sorabistiki w Lipsku stejiće w dołhej tradiciji serbstwa na uniwersiće.

Prěnje serbskorěčne zwučowanja na Alma Mater Lipsienis so započachu 1716 ze załoženjom Serbskeho prědarskeho towarstwa Societas Lusatorum Sorabica přez někotrych serbskich studentow ewangelskeje teologije. Nimo rěčnych a prědarskich zwučowanjow nastachu ćišćane serbske (hornjoserbske) pojednanja a rukopisna nowina.
 

Tež dźensa mamy žiwu serbsku studentsku kulturu w Lipsku.

Sorabija Lipsk z. t. angažuje so za wobchowanje serbskeje kultury a serbskich tradicijow zwonka Łužicy, mjenujcy w Lipsku. Towarstwo woswjeći w lěće 2016 swoje 300-lětne wobstaće a liči z tym k najstaršim zjednoćenstwam studowacych. Serbske nałožki so w Lipsku haja – tak organizuja so na přikład chodojtypalenje, mejemjetanje, kermuška. Mnozy serbscy studenća bydla w studentskim internaće na Arna-Nitzschowej, hdźež je tež jich klubownja centrifuga. Na kermušce, kotraž wotměje so stajnje na spočatku zymskeho semestra, přiwzaja so nowi studenća po tradicionelnym wašnju do Sorabije. Nimo toho so dźerža kontakty k někotrym zjednoćenstwam w Lipsku. Dźěl sobustawow skutkuje w radźe jědnaćoch Sorabije.

Sorabistika je studijny směr z wuběrnymi dźěłowymi wuhladami.

• Nuznje pytaja so serbscy wučerjo, kotřiž podadźa so po zakónčenju studija do Łužicy, zo bychu na serbskich šulach wuwučowali. Zdobom wobsteji tež móžnosć, na rěčnych šulach za dorosćenych dźěłać.
• Ale tež nimo wučerstwa skići sorabistika mnohostronske wuhlady zhladujo na dźěłowe městno, dokelž je spěchowanje mjeńšiny statnje zawěsćene a je jenož mało ludźi z wotpowědnymi znajomosćemi.
• Rozšěrjene znajomosće serbšćiny su trěbne za dźěło w zarjadach, administratiwnych zarjadnišćach abo w organizacijach, kiž so z rěču, literaturu, stawiznami, kulturu a wuměłstwom Serbow rozestajeja.
• Serbske institucije pytaja zdobom wosoby, kiž dale na mjenowanych wobłukach slědźa. Tak trjebaja Serbski institut z. t., Serbski muzej a Rěčny centrum WITAJ na př. rěčespytnikow abo historikarjow.
• Tež přistajenje pola serbskich medijow je móžne. Nimo wšelakich serbskich nowinow a časopisow přistaji tež serbska wotnožka sćelaka MDR sorabistow.
• Dale je tež dźěło jako přełožowar abo přełožowarka móžne.

• Naposledk skići tež turistowy sektor we Łužicy wjele dźěłowych městnow.

Studij na Instituće za sorabistiku skići móžnosć, so mnohostronsce angažować a přez hranicy swojeje wědy hladać.

Fachowe konferency dadźa studowacym móžnosć, so jako připosłuchacy abo samo jako přednošowacy wobdźělić a aktualne slědźenje sobu dožiwić. W poslednich lětach wotměwachu so na instituće n. př. konferenca k 70-lětnemu jubilejej Lipšćanskeje sorabistiki kaž tež Celto-Slavica 10. Institut organizuje nimo toho prawidłowny slědźerski seminar k temje mjeńšinowych rěčow, kotryž je za wšitkich zajimcow wotewrjeny. Přednošowacy pochadźeja zdźěla tež z druhich fachowych wobłukow a uniwersitow kaž tež z wukraja.

Institut za sorabistiku je tež mjezynarodnje splećeny, štož studowacym tyje. Štóž chce, móže dźěl studija we wukraju absolwować, kaž přez Erasmus-přebytk na partnerskimaj uniwersitomaj w Szczecinje (Pólska) a Galwayju (Irska).

Wědomje za europski a globalny kontekst mjeńšinowych rěčow wotewri nowy wid na serbsku rěč. W B. A. Europske mjeńšinowe rěče, ale tež we wólbnym wobłuku sorabistiki dawa móžnosć, dalše mjeńšinowe rěče wotkrywać, wosebje přez na instituće zakótwjeny lektorat iršćiny. Iniciatiwa studowacych ERIU Lipsk zwjedźe studowacych ze zajimom za mjeńšinowe rěče hromadźe a organizuje k tomu prawidłownje zarjadowanja.

Rěčna mnohotnosć je wažny dźěl kulturelneho bohatstwa Němskeje, Europskeje a swěta. Hódnota reginalnych a mjeńšinowych rěčow je tež wot Europskeje charty regionalnych abo mjeńšinowych rěčow připóznata, pod kotrejž stej tež hornjo- a delnjoserbšćina škitanej. Tež UNESCO je spóznawała wuznam rěčneje mnohotnosće a je 2022–2032 jako lětdźesatk indigenych rěčow pomjenowała. Za škitanje małych rěčow kaž serbšćiny trjebaja so kompetentni rěčnicy, kiž so aktiwnje za zdźerženje serbskeju rěčow zasadźeja. Studij sorabistiki přinošuje k zdźerženju serbskeju rěčow a k hajenju kultury a identity.

Požadanje je jeničce online móžne, normalnje přez portal AlmaWeb. Wšitke informacije k požadanju namakaće tu.

Požadanski čas za zymski semsester 2023/24 přez AlmaWeb skónči so 15.09.2023. Wšitke informacije k požadanskim a semesterskim časam namakaće tu.

Po wuspěšnym požadanju sćěhuje imatrikulacija na Lipšćanskej uniwersiće. Po tym slěduje zapianje do modulow za zymski semester. Wšitke wažne informacije namakaće tu na stronach uniwersity.

Zymski semester započina so za wšitkich nowych studentow ze zawjedźenskim tydźenjom wot 2. do 6. oktobra 2023, prjedy hač so 9. oktobra wučbne zarjadowanja započinaja. Na webstronje Lipšćanskeje uniwersity namakaće wšitke daty akademiskeho lěta kaž tež powšitkowne informacije k spočatkej studija. Na Instituće za sorabistiku přewjedźe so zawodne zarjadowanje Zahajenje semestra a tradicionelne twarjenje hodźinskeho plana, hdźež móžeće Wašich komilitonow a docentow zeznać. Dokładniše informacije k tomu namakaće na našej wosebitej stronje k spočatkej studija.